Иницијативен одбор на ВМРО-ДПМНЕ: Мицкоски ги навреди делегатите што го избраа

Сѐ уште актуелниот претседател на ВМРО-ДПМНЕ Христијан Мицкоски нема капацитет да ја води партијата што резултира со видлива несигурност и немир, кои предизвикуваат панични реакции на ароганција, гнев и навреди кои сите оние што се охрабруваат да ја кажат вистината што ја гледа целата јавност, реагира Иницијативниот одбор за свикување на вонреден конгрес на партијата.

– Вистината е дека Мицкоски е неспособен да ги привлече симпатиите на граѓаните и служи само како спаринг партнер во изборните победи на власта. Вистината е дека Мицкоски има погрешно поставени приоритети, а личните, лукративни интереси му се поважни од партиските и државните. Партиските членови и граѓаните ја препознаваат ароганцијата со која што ја прекрива сопствената несигурност и со тоа ја влече партијата надолу. „Заробеници“, „слуги“, „гадење“, „криминални обиди“, „стопан Заев“ се само дел од епитетите со кои Мицкоски вчера ги навредуваше делегатите што го избраа и му доверија партија од 150.000 членови – реагираат членовите на Одборот.

Според нив, недоличниот вокабулар на Мицкоски и заканите кои ги упатува ги препознаваат и граѓаните и меѓународната заедница и сметаат дека поради тоа тој е изолиран.

– Затоа Мицкоски бега од соочување со одговорноста. Затоа на Мицкоски му е неопходно членка на Централниот комитет на последната седница да бара збор за дискусија и да му кажува „насмејте се претседателе“. ВМРО-ДПМНЕ не може веќе да си го дозволи луксузот и да губи уште пет изборни циклуси пред да биде побарана одговорност од Мицкоски – порачаа членовите, кои закажаа вонреден конгрес на партијата на 28 март во Скопје.