Инфектолог од Словенија: Наесен нѐ чека катастрофа ако не се вакцинираат постарите од 50 години

Инфектолог од Словенија Бојана Беовиќ предупредила дека во Словенија наесен може да дојде до епидемиолошка катастрофа ако во август не се вакцинираат против ковид-19 повозрасните од 50 години.

– Кај таа популација повеќе од третина не се вакцинирани и важно е тие да се заштитат уште во август бидејќи во спротивно не чека катастрофа, болниците повторно ќе бидат полни со ковид пациенти – предупредува Беовиќ која ја води владината група за вакцинација.

Бројот на дневните зарази е во пораст, рекла таа на новинарите, додавајќи дека тоа е очекувано со оглед на доминацијата на позарзаната делта варијанта на вирусот.

– Според проекциите, делта сојот побрзо се шири и ќе се заразат поголем број луѓе кои имаат услови за потежок тек на болеста, а не се заштитени – вели Беовиќ.

Во неделата од 18 до 25 јули во словенечките лаборатории со секвенционирање е утврдено дека во 98.1 отсто од анализираните примероци на коронавирус станува збор за делта сојот, објави денеска владата и додаде дека изворот на зараза е во локалната трансмисија, но и од увоз од други земји.

Поради влошената епидемиолошка слика и порастот на бројот на заразени Словенија при крајот на неделава од сигурната зелена би можела да премине во поризичната портокалова фаза на епидемијата, објави телевизија Словенија, а во изјава за медиумите тоа го потврди и Јелко Кацин, координатор на кампањата за вакцинација.