„ИМАМЕ ЗАБЕЛЕШКИ ЗА ЏАФЕРИ И НЕМА ДА ЈА ГЛАСЕМЕ ТЕХНИЧКАТА ВЛАДА“ Трајанов предлага да се формира блок со ВМРО-ДПМНЕ со 61 пратеник
Лидерот на Демократски сојуз предлага да се формира поширок политички блок кој ќе обезбеди најмалку 61 пратеник, во кој би влегле сите партии кои нема да коалицираат со СДСМ и ДУИ, вклучувајќи ја и ВМРО-ДПМНЕ, а со цел да се разговара за коренити системски промени во државата.
Демократскиот сојуз нема да гласа за техничката влада, а смета дека ниту опозициската ВМРО-ДПМНЕ која согласно законот треба да номинира свои членови за технички министри во таа влада, нема обврска да гласа за неа, вели претседателот на партијата Павле Трајанов.
-Согласно Законот за Влада ВМРО-ДПМНЕ треба да партиципира со свои кандидати за министри за внатрешни работи и за труд и социјална работа и тројца заменици. На парламентарното мнозинство е, бидејќи презеле обврска, да избере техничка влада и технички премиер и прифатија тоа да биде Талат Џафери, за кој што има многу реакции и несогласувања. Парламентарното мнозинство треба да си обезбеди 61 пратеник и да изгласа техничката влада, не е обврска на другите партии, уште помалку на опозицијата задолжително да гласа. Дали ќе гласаат или не тоа ќе се види на самиот ден на гласањето- изјави Трајанов во гостувањето на ТВ Сител.
Според него, станува збор за техничка, а не политичка влада, која има обврска да создаде основни предуслови за организирање на фер и демократски избори.
Тој го повтори ставот дека очекува да не се избере техничка влада, туку Владата во оставка да продолжи до крајот на својот мандат, односно до прогласување на изборните резултати.
Тоа, како што вели, се заговарало веќе подолго време во СДСМ и да се префрли одговорноста на опозицијата, на ВМРО-ДПМНЕ, а ќе зависи од тоа, посочува тој, дали СДСМ и ДУИ ќе одат со заедничка листа или не на изборите.
Трајанов истакна дека ДС нема да гласа за техничката влада, бидејќи имаат сериозни забележи на однесувањето на Талат Џафери, затоа што, како што вели, не го почитувал Деловникот за работа на Собранието и блокирал законски проекти како измените на Изборниот законик за воведување една изборна единица, законот за борба против тешки облици на криминал и висока корупција.
Лидерот на Демократски сојуз предлага да се формира поширок политички блок кој ќе обезбеди најмалку 61 пратеник, во кој би влегле сите партии кои нема да коалицираат со СДСМ и ДУИ, вклучувајќи ја и ВМРО-ДПМНЕ, а со цел да се разговара за коренити системски промени во државата.
-Пандан на овој блок (европскиот фронт) што го заговара СДСМ, мислам дека треба да има нов силен опозициски политички блок кој ќе обезбеди најмалку 61 пратеник. Но треба, пред се, да разговараме за програмските определби. Јас сум за тоа да се подготви нов Устав кој навистина ќе создаде услови и за демократски и за севкупен развој на Македонија. Вака со Бадентер, со балансер, со блокади на целокупниот систем мислам дека тешко ќе се движиме напред – вели Трајанов.