ИМАМЕ КОНКРЕТНИ МЕРКИ ЗА ЧИСТ ВОЗДУХ Вреди удри по ДУИ поради негрижата за животната средина

ДУИ го загади албанското општество со криминал, коцкарници, тендери, неморал и непотизам. По 22 години власт, денеска, токму денеска, на ДУИ ѝ дојде на памет, за прв пат, да се грижи за животната средина во која живеат нашите граѓани, реагираше коалицијата Вреди преку соопштение.

„ДУИ е партија во чии мандати Тетово не доби вода, но доби депонија среде град. Кичево не доби чист воздух, но доби депонија среде град. Струга не доби статус на успешна општина, ама доби депонија среде град. Загадувањето на воздухот не е проблем од вчера. Состојбата со квалитетот на воздухот претставува долгогодишен предизвик, кој бара систематски и стратешки мерки. За жал, наталожените пропусти од изминатите години и влади не можат да се надминат за неколку месеци. Владата презема активности за воспоставување целосна контрола врз индустриските капацитети, промовирање еколошки извори на загревање, како и засилена континуирана инспекциска контрола и соработка со локалните самоуправи. Владата за прв пат донесе ‘Програма против загадување на воздухот 2024-2030’. Владата веќе усвои стратешки плански документ со конкретни програмски цели и проектни пакети, кои таргетираат намалување на емисијата на цврсти честички во градовите. Дополнително, изготвен е и Акциски план за грејната сезона, кој предвидува итни и краткорочни мерки за заштита на здравјето на граѓаните и намалување на аерозагадувањето“, се вели во реакцијата на Вреди.

Се спроведуваат засилени инспекции и контролa врз сите потенцијални загадувачи. Министерството за животна средина, во соработка со Државниот инспекторат за животна средина, спроведува засилени и вонредни контроли врз индустриските капацитети со А интегрирани еколошки дозволи. Континуирано се следи и квалитетот на воздухот, а јавноста редовно се информира за состојбата и препорачаните мерки за заштита.

„Загриженост на граѓаните е наша заедничка одговорност. Свесни сме дека граѓаните се соочуваат со реални проблеми поврзани со загадувањето на воздухот. Е токму затоа, наместо меѓусебни обвинувања и обиди за собирање политички поени, потребна е конструктивна соработка и мобилизација на сите засегнати страни — државни институции, општини, невладини организации и бизнис-секторот. Вреди останува посветена на спроведувањето на усвоените мерки и на унапредувањето на законската регулатива за заштита на животната средина. Ги повикуваме сите политички субјекти, вклучувајќи ја и ДУИ, да придонесат кон заедничките напори со конкретни предлози, поддршка и споделена одговорност — зашто здравата животна средина е приоритет за сите граѓани. Затоа, наместо обиди за политизација на ова прашање, Вреди ги повикува сите чинители да се фокусираат на спроведување и унапредување на веќе донесените мерки и програми, со цел да обезбедиме чист воздух и поздрава животна средина за сите“, наведено е во соопштението.