ИМА ЛИ КРАЈ НА ОПРАВДУВАЊАТА НА АРСОВСКА? Од СДСМ велат дека Универзална сала е стручно подготвен проект

Данела Арсовска веќе не знае како да се брани поради својата неспособност и започнува со целосни лаги да го правда своето неработење, реагира СДСМ.

„Откако го стопираше проектот за иградба на Универзална сала и двомесечен молк за причините поради кои го стопирала проектот, денес излезе со целосна лага во јавноста. Целосно е неточно дека проектот за изградба на Универзална сала е небезбеден. Проектот е професионално сработен и одобрен низ повеќе постапки од стручни лица и целосно е безбеден. Самиот проект уште на почетокот е пратен на мислење на Градежен факултет од каде е одобрен и тоа одобрување Град Скопје го има“, се наведува во реакцијата на СДСМ.

Оттаму велат дека проектое бил пратен и одобрен и од Институтот за сеизмолошки истражувања кој ја потврдил неговата безбедност и стабилност за градба.

„Надзорот на изградбата ги има исто така одобрено сите градежни зафати. Не постои ниедна постапка или процедура за изградба на Универзална сала која не е запазена во целост. Записници за технички решенија во тек на градба не се и не може ‘градежен безбедносен проблем’ да бидат оправдување за неспособноста на Арсовска. Јавно ја прашуваме, што се крие зад стопирање на проектот? Која е вистината, има ли бизнис интереси Арсовска и нејзиниот шеф Христијан Мицкоски од блокирањето на сите проекти започнати од власта на СДСМ?“, прашуваат од СДСМ.

Од владејачката партија нагласуваат дека редно е Арсовска да прекине да ја лаже јавноста и да се фати за работа, зашто, како што велат, скопјани веќе го изгубиле трпението во „најлошата градоначалничка која некогаш Скопје ја имало“.