ИЛИНДЕНСКИОТ МАРШ ГОДИНАВА ЌЕ БИДЕ МАСОВЕН Се пријавиле учесници од неколку градови

Здружението на граѓани од Горно Лисиче „Илинденски марш 1978“, годинава подготовките ги почна порано од вообичаено поради огромниот интерес за учество на маршот, и тоа не само од Аеродром, туку и од други општини и градови, како што се Кичево, Маврово и Свети Николе.

Се очекува традиционалната манифестација годинава да биде многу помасовна. Право на учество во маршот имаат сите заинтересирани мажи и жени од целата земја на возраст од 16 до 76 години, а досега покрај аеродромци, има пријавени коњаници од Кичево, Маврово и Свети Николе. Рокот за пријавување е до 30 јуни.

Коњичкиот марш стартува од паркот „Јане Сандански“ во Општина Аеродром кога на коњаниците им се предава општинското знаме, а крајната дестинација е Крушево, каде што треба да стигнат на 2 Август. Коњаниците придружувани од фаланга и играорци од КУД „Никола Јонков Вапцаров“, со звуците на зурлите и тапаните се упатуваат кон црквата „Свети Петар и Павле“ во Горно Лисиче, минувајќи низ главните булевари на општината.

Пред испраќањето на илинденците, секоја година се одржува свечена литургија, по што традиционално се организира и богата музичка програма со настап на познати македонски естрадни уметници.

Општината и оваа година финансиски ќе го поддржи Илинденскиот марш како една од најголемите и најзначајните манифестации во Аеродром, со што се негуваат традицијата и македонската култура.

Традиционалниот марш по повод еден од најголемите македонски национални празници – Илинден, ќе се одржи по 46. пат.