ИГРИТЕ МОЖЕ ДА ПОЧНАТ! Спектакуларно отворање на Олимпијадата во Париз, дождот ја зачини церемонијата

Олимписките игри во Париз беа отворени вечерва на спектакуларна церемонија која траеше повеќе од три часа. Силниот дожд ја зачини, но не ја расипа програмата која се состоеше од песни, танци, пиротехника, модна ревија и парада на олимпијците од целиот свет на бродови на реката Сена.

Претседателот на Франција, Емануел Макрон ги прогласи Игрите за отворени.

Олимпиското знаме стигна на оргинален симболичен начин со коњаник на сребрен коњ кој „галопираше“ по површината на Сена.

Кулминација на свеченоста беше пренесувањето на олимпискиот факел и палењето на олимпискиот оган во летечки балон кој лебди над Париз.

Македонија на Олимписките игри во Париз ќе ја претставуваат шест спортисти во шест спортови и четворица судии.

Македонските бои во Париз ќе ги бранат: Дарио Ивановски (атлетика), Владимир Егоров (борење/ до 57 кг, слободен стил), Никола Ѓуретановиќ (пливање/ 400 метри слободно), Анастасија Мојсовска (стрелаштво/10 метри воздушна пушка), Еди Шерифовски (џудо) и Мила Рељиќ (таеквондо). Покрај спортистите, Македонија на ЛОИ ќе ја претставуваат и судиите Ѓорѓи Начевски и Славе Николов (ракомет), Иван Михајловски (триатлон) и Анета Павловска (тенис).

Париз е домаќин по трет пат во историјата, по 1900 и 1924 година и му се придружува на Лондон, кој ги организираше Игрите во 1908, 1948 и 2012 година. Организацијата на Игрите ќе чини околу девет милијарди евра.

На Игрите учествуваат 10.714 спортисти, во 32 спортови, од 206 земји и територии, плус група спортисти кои ќе се натпреваруваат под знамето на МОК, како и тимот за бегалци. Поради војната во Украина, Русија и Белорусија не учествуваат.

Свеченото затворање на Олипијадата ќе се одржи на 11 август, на стадионот „Франција“ во париското предградие Сен Дени.