И МОЕТО ДЕТЕ ИМА ПРАВО ДА РАБОТИ Џафери не гледа ништо спорно во тоа син му да биде обвинител
Синот на собранискиот спикер Талат Џафери е само еден од децата на политичари кој положи во Академијата за судии и јавни обвинители.
Собранискиот спикер Талат Џафери смета дека нема ништо невообичаено во тоа што син му Барлет Џафери станува обвинител, иако имаше низа реакции за начинот на кој бил запишан и завршил како слушател на Академијата за судии и јавни обвинители.
Џафери посочува дека и Антикорупциска нема најдено ништо спорно во постапката преку која тој влегува во правосудните органи.
– И моето дете има право да конкурира и да биде примено на работа – изјави Џафери.
Синот на Џафери е само еден од децата на политичари кој положи во Академијата за судии и јавни обвинители.
Силна реакција за ваквата одлука пристигна од опозициската ВМРО-ДПМНЕ, а пратеничката Ели Панова од оваа партија вчера истакна дека изборот на синот на Талат Џафери за обвинител, за кој ДКСК отвори постапка дека положил правосуден пред да заврши факултет, е директен удар врз правосудството.
– Секој има право да конкурира, да се запише, да направи одреден успех, и да се рангира на одредена листа. Меѓутоа, за лица за кои што постојат сомневања, и притоа ДКСК отворила предмети, како што е на пример случајот со синот на Талат Џафери, за кој што излезе во јавноста дека всушност без завршен факултет полагал правосуден испит, и утре треба да биде обвинител или судија, е директен удар врз судството и обвинителството. Впрочем, како ние утре да веруваме дека некој од овие лица ќе дели правда, кога се отворила ваква дилема без да биде притоа затворена за јавноста и без да биде одговорено од институциите од кои што тоа се очекува – рече Панова.