И ДА ВРНЕ И ДА ВЕЕ ПОШТАР НЕ РАБОТИ БЕЗ ПЛАТА Вработените бараат редовни плати и подобри услови за работа
Синдикатот вели дека вларботените се вознемирени и од неизвесноста дали ќе се приватизира или не „Пошта“.
Вработени во експозитурите и подружниците на „Пошта“ низ земјава денеска одржаа предупредувачки протест, незадоволни од здоцнетите плати и условите за работа. Во Скопје протестот се одржа пред Дирекцијата.
– Поводот е задоцнување на платата, но не е само тоа. Нашиот револт и нашето стравување е поради лошата финансиска ситуација и кризата во која се наоѓа нашата компанија. Сакаме револтот да го изразиме преку овој протест и поради многу лоши услови за работа, а најмногу поради неизвесноста на вработените за иднината на компанијата, односно дали ќе се приватизира или владата и менаџерскиот тим ќе изнајдат начин за компанијата да излезе од оваа ситуација – изјави Боро Велигденов од Синдактот на „Пошта“.
Вработените се жалат дека исплатата на платите се пролонгира со задоцнувања од месец во месец, се работи со дотраени средства за превоз на поштенските пратки, како и несоодветни униформи, што сето заедно неповолно се одразува на квалитетот на услугите што ги дава субјектот.
Вработените од сите експозитури и подружници на „Пошта” најавуваат дека забелешките ќе ги достават до сите надлежни инстанци, од Управниот одбор до генералниот директор.