ХРВАТСКА Ѝ ПОРАЧА НА АМЕРИКА ДА НЕ Ѝ СЕ МЕША ВО БИЗНИСОТ Авиони ќе набави од Франција
Преговорите меѓу Хрватска и Франција околу договорот за набавка на 12 авиони „Рафал“ се во завршна фаза и тој ќе биде потпишан на време, пред крајот на годината, соопшти хрватското Министерство.
Министерството за одбрана на Хрватска одговори на неодамнешните информации во јавноста дека САД мораат да ја „аминуваат“ хрватската набавка на француските авиони-ловци „Рафал“.
Хрватското Министерство им порачаа на САД дека не треба да се мешаат во тој бизнис.
– Франција е оригинален производител на авионите „Рафал“ и целата нивна опрема компатибилна со НАТО. Затоа, не постои добивање дозвола за пренесување сопственост на Република Хрватска од некоја друга земја, вклучително и од САД – соопшти хрватското Министерство за одбрана.
Во соопштението понатаму се наведува дека, како што Министерството за одбрана досега набавуваше опрема за некои други борбени системи кои се користат во хрватската армија, така и за „Рафал“, станува збор за посебна набавка на опрема која вклучува американски компоненти под одговорност на Министерството за одбрана како краен корисник.