ОРЦЕ ЌЕ ГО ВРАТИ СЈАЈОТ НА СПОРТСКАТА САЛА „РАСАДНИК“ Храмот на спортот во рацете на Кисела Вода
Градоначалникот Орце Ѓорѓиевски ветува дека ќе започне процес за целосна реконструкција и враќање на сјајот на овој некогашен дом на спортот и на спортските великани.
Општина Кисела Вода го презеде управувањето со спортската сала „Расадник“. Извршено е примопредавањето и објектот, без долгови е преземен на трајно користење од владиното јавно претпријатие за стопанисување со објекти за спорт.
Градоначалникот Ѓорѓиевски, кој денес изврши увид во руинираната сала, истакна дека сега, откако Кисела Вода правно управува со неа, ќе почне процес за целосна реконструкција и враќање на сјајот на овој некогашен дом на спортот и на спортските великани.
– Со големо задоволство сакам да ве информирам дека конечно правно ја вративме салата Расадник. Ја презедовме без долговите кои ги имаше и почнуваме процес за нејзина темелна реконструкција. Со овој чин, ставаме крај на 30-годишната негрижа, која овој објект го претвори во руина, во демолиран, небезбеден и целосно уништен простор кој од најголема гордост, стана најголем срам, не само за Кисела Вода, туку и за цела Македонија. Од денес вртиме нова страница во приказната за салата „Расадник“. Од денеска испишуваме ново поглавје кое ќе го врати сјајот на овој спортски објект. „Расадник“ повторно ќе биде центар на најголемите спортски случувања, повторно ќе биде дом на црвено- црните и на сите други значајни клубови. Место од каде ќе одекнуваат аплаузи и навивања, место каде ќе се слави успехот – истакна градоначалникот Ѓорѓиевски.