📽️ ХАОС ВО ТИРАНА Молотови коктели кон Владата, полицијата возврати со солзавец

Протестот на опозицијата во Тирана, најавен како мирен марш, прерасна во насилен судир откако демонстрантите почнаа да фрлаат молотови коктели и пиротехнички средства кон владината зграда и други државни институции.

Собирот започна пред зградата на Владата, каде приврзаниците на опозицијата предизвикаа инциденти, по што мораше да интервенира и противпожарна служба. Полицијата ја растури толпата со водени топови и солзавец.

Протести се одржаа и пред Министерството за внатрешни работи, Министерството за инфраструктура, како и пред парламентот. Демонстрантите, предводени од опозицискиот лидер Сали Бериша, се обидоа да се приближат и до други објекти, но беа запрени од специјалните полициски сили.

Полицијата ја блокираше улицата што води кон поранешната вила на Енвер Хоџа, денес културен центар, кој беше цел и на претходни протести.

Во текот на вечерта, молотови коктели беа фрлани и кон полициски возила, што дополнително ја вжешти ситуацијата на улиците.

За првпат на протестите, покрај албанските и знамињата на Европската унија, беа истакнати и германски знамиња, како знак на поддршка за, како што наведоа организаторите, позициите на германскиот Бундестаг.

Опозицијата го избра датумот 22 март поради неговата симболика – денот кога во 1992 година Демократската партија победи на првите плуралистички избори по падот на комунистичкиот режим.

– Денешниот ден е уште еден голем ден за демократијата. Пред 34 години Албанците се збогуваа со диктатурата, а денес повторно се соочуваат со авторитарни тенденции – изјави Бериша пред почетокот на протестот.

За обезбедување на протестот беа ангажирани повеќе од 1.600 полициски службеници, вклучително и специјални единици.