ГРУБИ И БАЈРАМИ ЗЛОУПОТРЕБИЛЕ МНОГУ ПОВЕЌЕ ОД 8 МИЛИОНИ ЕВРА Никаде ги нема компјутерите и телевизорите купени за 400.000 евра
Над 400.000 евра е криминалот со набавка на разна компјутерска опрема и на телевизори, за кои е потпишан прием, а при извршување на попис воопшто не се пронајдени, рече пратеникот од ВМРО-ДПМНЕ, Бране Петрушевски.
Криминалот во Лотарија се шири, Артан Груби и Перпарим Бајрами злоупотребиле многу повеќе од 8 милиони евра, рече денеска на прес-конференција пратеникот од ВМРО-ДПМНЕ Бране Петрушевски.
– Договарани се тендери за набавка на телевизори, принтери и на компјутерска опрема, кои по спроведените проверки никаде не може да се пронајдат. Над 400.000 евра е криминалот со набавка на разна компјутерска опрема и на телевизори, за кои е потпишан прием, а при извршување на попис не се пронајдени воопшто – рече Петрушевски.
За ваквиот криминал кој е документиран, истражен и за кој се покренати постапки за неколку месеци по преземањето на власта, не може да не знаел СДСМ, додаде Петрушевски.
– Во СДСМ знаеле, но молчеле и им одговарало Груби и ДУИ да крадат, за тие што подолго да останат на власт. Сега откако сѐ излегува на површина, каде се СДСМ да го осудат Груби и да го повикаат да се врати? Наместо осуда на Груби, гледаме како смислуваат разни приказни. Приказните се единствено нешто кое им и остана. А одговорноста е таа која доаѓа – рече Петрушевски.