ГРЧКИ КЛИНИКИ НА ДИВО СОВЕТУВАЛЕ ПАЦИЕНТКИ ОД МАКЕДОНИЈА ЗА ИН ВИТРО ПО СКОПСКИ ХОТЕЛИ Гинеколозите револтирани, Инспекторатот направил вонреден надзор

Министерството за здравство во континуитет ја следи состојбата со појава на медицински консултантски услуги надвор од здравствените установи и навремено реагира. При најмал сомнеж веднаш се иницира вонреден инспекциски надзор од Државниот санитарен и здравствен инспекторат (ДСЗИ), како што беше постапено и во последниот случај кој беше предмет на јавен интерес, велат од Министерството за здравство, откако јавноста дозна дека грчката клиника за асистирана репродукција Newlife IVF Greece, со помош на локални посредници во хотели во Скопје, организира средби со пациентки од Македонија кои се борат со неплодност.

„Во тек е темелна реформа на повеќе закони од областа на здравството, меѓу кои и постојниот Закон за здравствена заштита, каде е регулирано рекламирањето и давањето консултантски услуги. Работните групи формирани за реформа на законските решенија ги разгледуваат можностите за унапредување и зајакнување токму на овој сегмент од законската регулатива. Нашата цел како Министерство е да ги заштитиме граѓаните од која било форма на злоупотреба, поврзана со обезбедувањето медицински услуги надвор од здравствените установи“, се додава во одговорот од Министерството за здравство испратен до Плусинфо.

Приказната отишла во етер, а консултациите онлајн

Како што објави „Слободен печат“, во скопски хотели се одвивала мрежа на „медицински консултации“, што отвора сериозни сомнежи за заобиколување на македонските закони за ин-витро, односно за биомедицинско потпомогнато оплодување. Следните консултации биле закажани за 7 февруари во Скопје, но биле откажани со образложение „непредвидливи околности“, откако приказната добила медиумски интерес. Наводно, тие биле префрлени онлајн.

Преку социјалните мрежи било најавено дека консултациите ќе ги држи извесен лекар Димитриос Довас, кој немал времена лиценца од Лекарската комора на Македонија за такви активности во земјава.

„Возбудливи вести за нашите пријатели во Северна Македонија! Не мора да патувате преку границата за да добиете стручен совет што го заслужувате. На 7 февруари, тимот на Newlife IVF Greece ја носи нашата експертиза во Скопјe. Д-р Довас и Елена Најдоска ќе бидат домаќини за бесплатни, приватни медицински консултации. Ова е вашата шанса да разговарате за вашето патување кон плодноста во опуштена атмосфера без притисок, само професионално водство и персонализиран план за вашата иднина“, се наведува во објавата на Фејсбук на грчката клиника.

Од ДЗСИ објаснуваат дека такви консултации за пациенти се дозволени само во здравствени установи, а не во хотели. Инспекторат најави дека ќе изврши вонреден инспекциски надзор во хотелот и врз основа на констатираната состојба ќе постапи согласно законските надлежности.

Во меѓувреме, дознаваме дека се откажани и консултациите закажани за денеска и за утре за во друг скопски хотел, од друга клиника од Солун. И тие биле најавени преку социјалните мрежи.

Македонските гинеколози бараат контрола врз ваквите активности

Гинеколозите од Македонија што се занимаваат со ин-витро ја сметаат ваквата пракса за нелојална конкуренција. Реагираше Здружението за хумана репродуктивна медицина, кое се спротивставува на ваков тип неконтролирани здравствени услуги, без соодветни дозволи од нашите институции.

– На македонските доктори ваков тип услуги во странство не им е дозволен, без соодветни одобренија од надлежни институции. Од Лекарската комора на Македонија нè известија дека барања за дозволи за ваков тип здравствени услуги нема во процедура ниту некогаш биле побарани и дека како такви овие активности вршени вон здравствени установи и без соодветна дозвола се сметаат за здравствени услуги спротивни на одредбите од Законот за здравствена заштита. Активностите се организираат преку социјалните мрежи и форуми и немаме повеќе информации за лицата кои се посочуваат како организатори. Не навлегувајќи во мотивите и структурата на пациентите кои би се регрутирале со вакви активности, ниту негирајќи го основното право на пациентите за свои средства да изберат институција за лекување, ја потенцираме потребата од контрола врз вакви активности – изјави за „Слободен печат“ професор доктор Глигор Димитров, претседател на Здружението за Хумана репродуктивна медицина.

Како што може да се види од објави на социјалните мрежи на клиниката Newlife IVF Greece такви консултации биле организирани и лани во скопски хотел, но очигледно немало соодветна реакција од надлежните. Ќе постапат ли соодветно овој пат?