Градоналачникот на Берово, Звонко Пекевски позитивен на ковид-19, ќе работи од дома

Градоначалникот на Општина Берово, Звонко Пекевски е позитивен на ковид-19 вирусот. Пекевски кој во текот на изминатите денови имал благи симптоми направил тест, чиј резултат утврдил присуство на Ковид-19 вирусот.

Во својата изјава до јавноста Пекевски вели дека своите работни обврски во време на изолација во наредниот период ќе ги извршува од својот дом.

– Почитувани сограѓани, во време на здравствена криза, чувствувам обврска, да ве известам, дека по добивањето на благи симптоми и по направениот тест за ковид 19, резултатот од моето тестирање излезе позитивен. Ве известувам дека, како Општина, гарантирајќи ја здравствената сигурност на граѓаните, работните обврски, до завршување на периодот на лекување, ќе продолжам да ги извршувам од својот дом – истакна Пекевски.

Ова како што додаде градоначалникот на Берово е доказ дека вирусот никого не остава имун поради што упати апел до граѓаните за почитување на мерките за заштита.

– Чувајте се, почитувајте ги мерките за заштита и придонесете за доброто во заедницата, заштитувајќи го колективното здравје – додаде Пекевски.