ГРАД СКОПЈЕ ВЕЛИ ДЕКА СЕ НЕТОЧНИ ТВРДЕЊАТА ДЕКА ЌЕ ЈА ИЗГУБИ ТИТУЛАТА ГРАД НА КУЛТУРАТА Подготовките течат според предвиденото, тврди Градот
Процесите во исполнување на превземените обврски Скопје – Европски Град за 2028 година течат според предвидената и договорената динамика, вели адвокатот Трајче Арсов, кој во име на Град Скопје ја демантира информацијата дека градската власт ќе ја изгуби титулата.
Град Скопје ги негира тврдењата дека ќе ја изгуби титулата Европски град на културата и тврди дека исполнувањето на превземените обврски тече според планираното.
„Во својство на полномошник на Град Скопје, Ви се обраќаме поради следното: На 19.12.2024 година на интернет порталот plusinfo.mk, е објавен текст со наслов „СКОПЈЕ ЈА ГУБИ ТИТУЛАТА ЕВРОПСКИ ГРАД НА КУЛТУРАТА? Неспособноста на градските власти скапо ќе нè чини, повик за петиција за спас“ во кој се изнесени невистинити тврдења за факти на сметка на Град Скопје. Тврдењата дека „Градот Скопје ја губи титуталата Европски Град на културата и дека подготовките бележат значителни доцнења“, пренесени од извесен Илија Вучков, се неточни, манипулативни и шпекулативни. Напротив, процесите во исполнување на превземените обврски Скопје – Европски Град за 2028 година течат според предвидената и договорената динамика. Сметаме дека порталот врши неточно и нефер изветување, без претходно да провери и да побара изјава од Град Скопје, а со тоа предизвикува штета на угледот на Град Скопје, па од тие причини бараме да го објавите овој демант, во рок од 48 часа од приемот на ова барање“, напиша адвокатот Трајче Арсов, во име на Град Скопје.