Граѓански активисти ќе се кандидираат за независни советници во Тетово на претстојните избори

Активисти од повеќе граѓански здруженија во Тетово денеска објавија дека ќе се кандидираат за советници на Тетово на претстојните локални избори. Тие ќе настапат на заедничката листа на независни кандидати, пренесе ТетовоИнфо мк.

Во иницијативата „Подобро за Тетово“ досега се вклучени 30 активисти на граѓански здруженија.

– Ние сме денеска тука за да ви ја презентираме нашата иницијатива за кандидирање и листата за Советот на општина Тетово на локалните избори кои ќе се одржат во октомври. Ние сме луѓе од граѓански сектор, луѓе со различни професии. Знаеме во каква состојба се наоѓа нашето Тетово, колку е деградирано и ние сакаме да ги претставиме сите проблеми внатре во Советот на општина Тетово – изјави Хамди Сулејмани, граѓански активист.