ГРАЃАНИТЕ ИМААТ ДВЕ ОПЦИИ НА ОВИЕ ИЗБОРИ Мицкоски вели дека нема трета опција

Две опции има на овие избори, од една страна се ВМРО-ДПМНЕ и коалицијата, а од друга страна коалицијата СДСМ-ДУИ-Левица, трета опција нема, рече премиерот Христијан Мицкоски при посета на општина Градско одговори на новинарско прашање.

– Што се однесува на изборите, граѓаните на овие избори имаат две опции едната опција е коалицијата СДС-ДУИ и Левица, тоа е коалицијата Венко Филипче, Али Ахмети, Димитар Апасиев, па и да кажев Димитар Заев немаше да биде грешка, бидејќи гуруто во позадина на оваа коалиција е тој. И тоа е патот што 7 години го гледавме. Пат на криминал, корупција, национални понижувања, неработа, неиспорака, тоа е тој пат. И следната опција е ВМРО-ДПМНЕ и коалицијата којашто ја предводи ВМРО-ДПМНЕ. Тоа е она коешто ние го нудиме заедно со поддршката која ја имаме од граѓаните изминатите 15 месеци, еве веќе 16 месец работиме – рече тој.

Премиерот ги повика граѓаните да гласаат за онаа опција за којашто сметаат дека е подобра.

– Доколку граѓаните се задоволни од тоа што ние го работиме, јас ги повикувам по сопствена волја да излезат и на изборите на 19 октомври да го дадат својот глас за онаа опција за којашто сметаат дека е подобра. Ќе повторам две опции се, една опција е коалицијата СДС-ДУИ и Левица, тоа е едната коалиција, едната опција, треба сите да знаат, ако некој мисли дека тоа во обланда се сервира, не, тоа е јавно, јасно профилирана коалиција и втората опција е ВМРО-ДПМНЕ со коалицијата, така што нема трета опција. Трета опција не постои, секој оној којшто со седење дома, со апстинирање ќе казни некого, ќе покаже пркос, или пак ќе испрати некаква порака се лаже. Тогаш тој директно гласа за Венко Филипче, за Али Ахмети и за Димитар Апасиев. Тоа е опцијата – од една страна коалицијата на ВМРО-ДПМНЕ, од друга страна се овој трилинг на асови – Венко Филипче, Димитар Апасиев, Али Ахмети. Тоа е опцијата на овие избори – истакна Мицкоски.