На лекарите од јавното здравство им се забранува да одат во приватно за време на пандемијата

Откако ќе се изгласа Законот за здравствена заштита со измените и дополнувањата, пациентите во приватните болници кои се лекуваат од ковид, ако е комплексно лекувањето и долго трае, максималната сума што треба да ја платат е 300.000 денари, информира денеска министерот за здравство Венко Филипче.

– Станува збор за сума што пацинетите ја плаќаат во приватните болници, а таму заминале на своја волја да се лекуваат, како што тоа го прават сега, а плаќаат голема сума пари. Ако треба ние да ги користиме како држава ресурсите на приватните болници, тогаш за тие ресурси не плаќаме никаков надоместок кон приватните болници, а Фондот си ја презема услугата на плаќање. Таква ситуација засега нема – појасни Филипче по барање на новинарите, откако денеска ја посети арената „Борис Трајковски“ каде во тек е вакцинирањето против коронавирусот.

Во однос на капацитетите за лекување, информира Филипче, се соочиле со одреден проблем согласно Законот за кризна состојба.

– Во таа насока, едно од дополнувањето на Законот за здравствена заштита е сето тоа да се прави без надомест, а не како што предвидуваше тој закон за менаџирање со кризи. Со тоа се соочивме кога разговаравме претходниот пат за користење на капацитети на приватните болници со 30 отсо , па тешко беше да се прифатат затоа што не се однесуваше на болници. Понатаму за целосна забрана на кадар од јавното здравство да преминува во приватно за време на прогласена кризна состојба или пандемија од заразна болест. Понатаму цената што пациентите сами приватно ја плаќаат да се ограничи на ниво на цената на пакетите што Фондот за здравствен осигурување  ја плаќа кон Јавно здравствените установи. Таа цена изнесува од 40 до 300.000 денари зависно од типот на лекување, односно дали е тоа лекување интензивно, односно дали се користи респираторна машина или не – изјави  Филипче.

Здравствените работници во текот на овој месец ќе го добијат покачувањето на плата од пет отсто за март, најави министерот за здравство Венко Филипче, појаснувајќи дека досега се барало начин како тоа формално правно да се направи.

На состаноци со претставници на Синдикатот на здравствени работници се дискутирало дали покачувањето може да биде дел од анкесот на Колективниот договор или со оглед на тоа што сумата од пет проценти доаѓа како поддрршка преку кредитот од Светска банка не може да се пресмета во основната плата, ќе биде како бонус- додаток.

– Во таа смисла ќе биде и нешто поголема сума заради тоа што ќе биде само дополнување. Средства се обезбедени и овој месец ќе ги добијат петте проценти – изјави Филипче.

Како што истакна министерот за здравство, се планирало ако не се стигне во мај, здравствените работници да добијат дупла сума за изминатите два месеца, а потоа да се продолжи со по пет проценти.