📷 ГОРИ ФАБРИКАТА „ВИНЧИНИ“ ВО ВИНИЦА Гасат пожарникарите од Виница и од Кочани, итно доаѓа помош од другите градови

Голем пожар избувна попладнево во фабриката за кандирани производи и вафли „Винчини“ во Виница, пожарникарите се борат да го совладаат.

– Денеска во 18.40 часот, во Центарот за управување со кризи преку бројот Е-112 е добиена пријава за пожар во фабриката за кандирани производи и вафли „Винчини“ во Виница. Пожарот избувнал во магацините и во производствените погони 6, 7 и 8 на фабриката. На терен веднаш излегле екипите на ТППЕ Виница со неколку противпожарни возила и пожарникари – информира директорот на ЦУК, Мухамед Али.

До градоначалникот на Виница е дадена насока да побара дополнителна поддршка и помош од соседните општини, додава директорот на ЦУК.

– Веќе се вклучени ТППЕ Кочани и ДПД Кочани со сите свои капацитети и ресурси, а поддршка е побарана и од Општина Македонска Каменица и од Општина Штип. Доколку биде потребно, ќе се ангажираат сили и од други општини. Со оглед на тоа дека станува збор за специфичен урбан пожар, неопходно е ангажирање исклучиво на професионални пожарникари – вели Али.

За пожарот информираше  и директорот на Дирекцијата за заштита и спасување, Стојанче Ангелов.

– Голем пожар изби во фабриката „Макпрогрес“, позната по брендот „Винчини“. Во моментов со огнот е зафатен еден погон, а локалните винички пожарникари со подршка на пожарникари од Кочани се обидуваат да го спречат ширењето на огнот кон останатите погони. На помош тргнаа пожарникари од Свети Николе, Струмица и од Пробиштип – соопшти Ангелов.