📽️ ГОРИ ФАБРИКАТА НА „КОМОДИТА“, ЦРН ЧАД ГО ПРЕКРИ ГРАДОТ Пожарникарите се борат со огнот во Ѓаковица, се огласи компанијата
Густ црн чад и пламен видлив од километри, пожарникарите и безбедносните сили се борат со огнот од големи размери
Голем пожар попладнево ја вознемири Ѓаковица, Косово, откако избувна огнена стихија во фабриката за душеци „Комодита“. Густ црн чад се издигна над градот и беше видлив од километри, додека пламените јазици брзо го зафатија објектот.
Од полицијата потврдуваат дека пријавата за пожарот на улицата Ѓерѓ Соколи била примена околу 16:40 часот, по што на терен веднаш биле испратени сите расположливи противпожарни екипи.
Пожарникарите со часови се борат со огнот од големи размери, обидувајќи се да го локализираат и да спречат негово ширење кон околните објекти. Полициските единици го обезбедуваат поширокиот реон, а сообраќајот во близина е под контрола.
Од компанијата „Комодита Хоум“ јавно им се заблагодарија на сите служби вклучени во интервенцијата – Министерството за внатрешни работи, безбедносните сили на КБС, градоначалникот на Ѓаковица, директорот на АМЕ, противпожарните единици од Ѓаковица, Призрен, Јуник, Дечан и Раховец, како и на припадниците на КФОР и КБС за, како што наведуваат, „брзата реакција и подготвеноста за помош“.
Засега нема официјални информации за повредени лица, а причините за пожарот допрва ќе се утврдуваат.