Го разрешија секретарот ама ќе му ја дадат и втората доза од вакцината

Разрешениот секретар од Охридската болница ќе си ја прими и втората доза од вакцината против ковид-19, иако беше казнет што бил вакциниран преку ред, потврди денеска Министерството за здравство.

– За секој граѓанин кој ја примил првата доза од вакцината, ќе биде обезбедена и втората доза – рекоа од Здравство одговарајќи на прашањето на Плусинфо дали на секретарот од Охридската болница кој ја прими првата доза па беше разрешен, ќе му биде дадена и втората доза.

Иако во саботата министерот Венко Филипче најави ревизија на сите вакцинирани, како и строги казни за оние кои направиле злоупотреби, денеска од Здравство велат дека никој друг во земјава не примил вакцина преку ред.

На прашањето колкав е бројот на лица вакцинирани преку ред, од Министерството одговорија:

– Според доставените списоци од страна на директорите, сите коишто се вакцинирани се здравствени работници кои работат со ковид пациенти. На Клиниките за гастроентерохепатологија и пулмологија во Скопје нема здравствени работници кои се вакцинирани преку ред.

Од Министерството денеска рекоа и дека во земјава сѐ уште нема детектирано присуство на јужноафриканскиот сој на корона вирусот.