ГЕРМАНИЈА НЕМА ДА ЈА ПРИЗНАЕ ПАЛЕСТИНА Мерц тврди дека нема предуслови за таков чекор

Германија нема да им се придружи на партнери како Канада и Франција во признавањето на палестинската држава, изјави канцеларот Фридрих Мерц денеска по средбата со канадскиот премиер Марк Карни, јави ДПА.

– Ние нема да се придружиме на оваа иницијатива. Не сметаме дека условите за признавање на државата се исполнети на кој било начин во моментов – рече Мерц на заедничката прес-конференција со Карни во Берлин, пренесе германската агенција.

Германија смета дека признавањето на палестинската држава е меѓу последните чекори во решението за 2 држави во кое Израелците и Палестинците можат да живеат мирно еден покрај друг.

Спротивно на тоа, Карни кон крајот на јули објави дека неговата земја ќе ја признае Палестина на Генералното собрание на ОН во септември. Францускиот претседател Емануел Макрон исто така планира да го стори тоа, додека, пак, Велика Британија му се закани на Израел дека ќе го стори тоа доколку не се исполнат одредени услови, потсетува ДПА.

Иако Мерц воведе делумно ембарго за оружје врз Израел како одговор на израелските планови за проширување на војната во градот Газа, тој сега потврди дека Германија нема да ги следи неговите партнери во признавањето на Палестина, дури и откако Обединетите нации прогласија дека се појавил глад во делови од Газа.