Гази Баба и Аеродром ќе се подноват со 60 контејнери за стаклена амбалажа

Градот Скопје, ГИЗ и ЈП „Комунална хигиена“ денеска потпишаа договор за нови 60 контејнери за депонирање отпад од стаклено пакување, што Град Скопје ги доби како донација во рамките на регионалниот проект „Управување со стаклена амбалажа на Западен Балкан”, информира Градот.

Градот Скопје е една од шесте единици на локална самоуправа опфатени со овој проект, покрај Битола, Гевгелија, Илинден, Штип и Тетово и е еден од 14-те градови и општини од трите земји учеснички во  овој проект – С Македонија, Србија и Босна и Херцеговина.

– Само од овој проект обезбедени се вкупно 122 контејнери за стакло, имајќи ги предвид и претходните 62 кои веќе се распоредени низ нашиот град неколку месеци. Во таа насока дозволете да изразам благодарност до ГИЗ, ЗЕЛС и „Пакомак“, кои се имплементатори на проектните активности. Овие 60 контејнери, ќе бидат распоредени во општините Гази Баба и Аеродром. Целта е со зајакната отпадна инфраструктура да се дејствува за подигање на свеста на граѓаните за рециклирањето на стаклото како амбалажен материјал. Дополнително, со тоа ќе им се овозможи на ангажираните експерти кои ќе го следат целиот процес, да развијат соодветен модел за рециклажа на стакло, што во иднина ќе биде применлив и во други вакви средини – рече градоначалникот Петре Шилегов, на денешната промоција на новите контејнери.

Веќе од утре, новите контејнери ќе се поставуваат на утврдените локации, по што се очекува да се собере најмалку 20 отсто повеќе стакло во однос на претходната година.