Ганиу: Иако се со адреса во Чаир, многу од заболените живеат во други општини

Градоначалникот на Чаир Висар Ганиу кој е во самоизолација поради контакт со сограѓанин заболен од коронавирус, вели дека последните денови во општината има фрапантен број на заразени.

— Не сакам да прејудицирам и немам ингеренции да навлегувам во анализи зошто состојбата е таква и дали ифтарските вечери и празникот имаа клучно влијание во тоа. Според информациите што иако не се објавуваат јавно, сепак јас ги добивам од командирот на полицијата заради поголеми сознанија и заштита, секојдневно има по пет-шест новозаразени со исто презиме, од што е очигледно дека станува претежно збор за семејства – рече тој.

Градоначалникот вели дека првите месеци од епидемијата, со мали исклучоци, граѓаните ги почитувале препораките.

– Но се искреира ситуација дека ковидот помина, се ширеа лажни вести од странски експерти дека вирусот не е опасност и откако Владата ги олабави мерките, луѓето прекинаа да се плашат од вирусот – рече Ганиу.

Денеска има 11 новозаразени од општина Чаир, но Ганиу вели дека нема логика само оваа општина да биде ставена во карантин, затоа што, како што тврди, дел од заболените иако се со адреса на живеење во Чаир, сепак физички живеат во други скопски општини.

– Мора добро да се согледа ситуацијата и да се има предвид дека Чаир е артерија меѓу општините Шутка и Бутел – рече Ганиу.

Тој правел тест за кронавирус попладнево, но резултатите ќе ги знае утре.