ГОНЕТЕ ГИ ЛИДЕРИТЕ НА ХАМАС КАДЕ И ДА СЕ Нетанјаху му дал инструкции на израелското разузнавање

Израелскиот премиер Бенјамин Нетанјаху изјави дека ѝ дал инструкции на разузнавачката агенција Мосад да им влезе во трага на членовите на раководството на исламскиот екстремистички Хамас кои живеат надвор од Појасот Газа во странство.

– Му дадов инструкции на Мосад да дејствува против лидерите на Хамас, каде и да се – изјави Нетанјаху на синоќешната прес-конференција.

Тој одговараше на новинарска оценка дека лидерот на Хамас Исмаил Ханије и Калед Машал, неговиот претходник, се „еуфорични“ поради војната и очекуваат да продолжат да владеат со Газа кога ќе заврши. Двајцата живеат во странство.

Повеќето високи членови на Хамас живеат во егзил, главно во Катар и Бејрут, главниот град на Либан.

Мосад во последните години беше обвинет за серија убиства во странство не само на палестински екстремисти, туку и на ирански нуклеарни научници.

Истовремено, израелските одбранбени сили утрово соопштија дека израелската авијација нападна цели на проиранската милиција Хезболах во Либан.

Израелскиот министер и член на воениот кабинет Бени Ганц ја предупреди милитантната група Хезболах дека „она што се случува“ во северниот дел на Газа може да се случи и во јужен Либан и Бејрут.

– Знаеме како да се справиме со оние кои нè напаѓаат, како и со оние што ги испраќаат – рече Ганц на прес-конференција, пренесува „Тајмс оф Израел“.