ФРОДЕМ бара петте милиони евра наместо кај партиите да влезат во џебот на граѓаните

Фронтот за демократска Македонија (ФРОДЕМ) предлага петте милиони евра од буџетот наменети за финансирање на политичките партии да се пренаменат и распределат на 100.000 најзагрозени семејства (со по 50 евра по семејство) според критериуми определени од Министерството за труд и социјална политика и Владата на Република Македонија.

„Финансирањето на политичките партии со пари на граѓаните е нелегитимно озаконет грабеж на сограѓаните од страна на двете големи политички партии и нивните сателит партии. Основната цел на ваквото квази законско решение е лидерите и раководствата на партиите безгрижно, но и луксузно да ги минуваат деновите од едни до други избори, притоа натпреварувајќи се, кој ќе успее да излаже и изманипулира поголем број свои сограѓани. Затоа ФРОДЕМ ѝ предлага на Владата со Уредба со законска сила да го сопре понатамошното финансирање на политичките партии со пари од буџетот на државата. Срамно, жално и нечовечки е политичките партии да добиваат народни пари од граѓаните кога тие едвај егзистираат на дневна основа“, се наведува во соопштението од ФРОДЕМ.