ФРАНЦУСКИ ГРАНТ ОД 600.000 ЕВРА ЗА ДИГИТАЛИЗАЦИЈА НА ПРЕНОСНАТА МРЕЖА ЗА СТРУЈА Потпишан договорот за реализација на проектот

Македонскиот преносен систем (МЕПСО) доби грант од 600.000 евра од Француската агенција за развој со кој ќе ја унапредува, модернизира и дигитализира преносната мрежа за електрична енергија.

Грантот овозможува насочена техничка помош за унапредување, модернизација и дигитализација на преносната мрежа – суштински чекори за обезбедување стабилно снабдување со електрична енергија, намалување на техничките загуби, зголемување на ефикасноста на системот и подготовка на МЕПСО за растечкиот удел на обновливи извори и интеграцијата на регионалниот пазар.

Проектот е фокусиран на четири клучни области: изработка на студии за адекватност на системот со користење на пазарниот симулатор ANTARES, димензионирање на системските резерви, воспоставување методологија за пресметка на преносни загуби и изработка на студија за изводливост, како и подготовка на концептуален дизајн за дигитализација на трафостаница.

– Пилот-проектот за дигитализација, фокусиран на развој на целосно дигитална трафостаница со напредни системи за заштита, управување и надзор, претставува конкретен чекор кон трансформација на МЕПСО во попаметен, поефикасен и ориентиран кон иднината оператор на преносниот систем рече генералниот директор на МЕПСО Бурим Љатифи по потпишувањето на договорот.

Заменик- директорот на  Канцеларијата на AFD за Западен Балкан и Франсоа Винс подвлече дека овој нов договор ја илустрира континуираната посветеност на AFD кон модернизација на преносната мрежа во Северна Македонија.

Тој додаде дека оваа соработка е дел од посилната заложба на AFD за поддршка на македонските партнери, и со задоволство ја искористи оваа прилика да го најави отворањето на локалната канцеларија на AFD во Скопје, која ќе ја претставува Мелани Малинво.

На настанот присуствуваа  министерката за енергетика, рударство и минерални суровини Сања Божиновска, амбасадорот на Франција во земјава Кристоф Ле Ригољер и  Вероника Милевски, извршна директорка на RTE International.

Во своето обраќање Божиновска ја нагласи важноста на ова партнерство за изградба на современ и отпорен енергетски систем.

–  Оваа поддршка е значајна за граѓаните и стопанството. Понапредна и попаметна мрежа значи помалку прекини, подобро искористување на чиста енергија, посилни регионални врски и поголема отпорност на системот – без разлика дали станува збор за временски услови, флуктуации на побарувачката или пазарна нестабилност – рече Божиновска.

Вероника Милевски, извршна директорка на RTE International, изјави дека проектот претставува значаен чекор напред за енергетскиот сектор на Северна Македонија – обединувајќи ја националната амбиција, регионалната соработка и европското партнерство.

– Договорот обединува напредно моделирање на електроенергетскиот систем, иновативно предвидување на резервите со користење на вештачка интелигенција и пилот-проект за дигитализација на трафостаница од 110 kV – одлучувачки чекор кон поотпорна, потранспарентна и поконкурентна електроенергетска мрежа -рече Милевски.

Амбасадорот на Франција Ле Риголер, нагласи дека овој договор претставува уште еден чекор напред во продлабочувањето на партнерството меѓу Франција и Северна Македонија.

Во рамките на проектот, експерти од RTE International – подружница на францускиот оператор на преносниот систем RTE – веќе одржаа обуки за инженерите на МЕПСО за користење на симулаторот ANTARES, со што се унапредуваат нивните технички и аналитички капацитети за поефикасно управување со системот во сè подинамичен електроенергетски пазар.

Проектот ќе продолжи со нови активности за градење капацитети и техничка поддршка, со што ќе се овозможи примена на напредни технологии и аналитички модели за управување со преносниот електроенергетски систем на Северна Македонија.