Франција: Нови 509 жртви на корона, повеќе од 6.000 лица на интензивна нега

Во најновиот извештај за епидемијата со ковид -19 во Франција за изминатите 24 часа, се наведува  дека има нови 509 смртни случаи, а  6.107 лица се на интензивна нега, јави дописникот на МИА.

Жером Саломон, генералниот директор за здравство, објави дека од 1 март се регистрирани 4.032 смртни случаи во болниците од коронавирусот, 509 повеќе во изминатите 24 часа.

Оваа „целосно исклучителна“ епидемија, според зборовите на Саломон, принуди на хоспитализација 24.639 лица, од кои 6.017 во сериозна состојба се наоѓаат на интензивна нега.

– Тоа е повеќе од почетниот капацитет на Франција за реанимација – забележа Саломон.

Според податоците, досега имало 10.935 излекувани лица од вирусот.

Во текот на вчерашниот ден имало  3.745 лица кои биле примени во ургентните служби на болниците, а 1.328 интервенции на СОС лекари поради симптоми на коронавирусот.

Градските лаборатории, способни сега да вршат 20.000 тестови дневно, овозможија да се потврдат вкупно 56.989 случаи на заразени со коронавирусот.