ФОТОГРАФИИ НА МЕЛОНИ СЕ ПОЈАВИЈА НА ПОРНО СТРАНИЦА Италијанската премиерка е згрозена

Италијанската јавност е потресена од нов дигитален скандал – премиерката Џорџа Мелони и уште неколку познати жени завршија на порнографска веб-страница без нивна согласност.

На платформата „Phica“, која имала повеќе од 700.000 претплатници пред да биде затворена, биле објавени и фотографии на нејзината сестра Аријана Мелони, како и на лидерот на опозицијата Ели Шлајн.

Сликите биле преземени од социјални мрежи или јавни извори и брутално обработени – зумирани делови од телото, додавани навредливи описи и прикажувани во понижувачки позиции.

– Згрозена сум од она што се случи и сакам да ја изразам мојата целосна солидарност и поддршка на сите жени кои беа навредени, понижени и чија приватност беше нарушена – изјави премиерката за „Corriere della Sera“. Таа додаде дека е „разочарувачки што дури и во 2025 година постојат луѓе кои сметаат дека е прифатливо да се гази достоинството на жената и да се кријат зад анонимност или тастатура“.

Платформата, која постоела од 2005 година, беше затворена откако случајот предизвика масовна осуда. Администраторите се обидоа да ја префрлат вината врз самите корисници, извинувајќи се за „токсичното однесување“ што, според нив, ја поткопало „првичната намена“ на страницата.

Овој скандал следи по претходното отстранување на Фејсбук групата Mia Moglie („Мојата сопруга“), каде што се објавуваа интимни фотографии на жени без нивна согласност.

Мелони предупреди дека и навидум безопасна содржина „може да стане опасно оружје во погрешни раце“, повикувајќи на брза идентификација и строго казнување на одговорните.