ФИЛИПЧЕ СЕ ФРЛИ КОН АЛБАНОФОБИЈА ЗА ДА ГИ ПРИКРИЕ НЕУСПЕСИТЕ Анти ДУИ наративот нема да му помогне на СДСМ
Ако Филипче и неговата партија сакаат да изградат подобра иднина за граѓаните, треба да ги прекинат обидите за копирање на раздорните пристапи од минатото и да се фокусираат на изградба на наратив што ги обединува граѓаните и ја промовира стабилноста, соопшти опозициската ДУИ.
Користењето на албанофобијата како политичка алатка не е само неодговорно, туку и штетно за социјалната кохезија и стабилноста на Македонија, соопшти опозициската ДУИ.
„Последните изјави на Венко Филипче, со кои тој се обидува да го искористи анти-ДУИ наративот за да ги прикрие неуспесите на неговата партија, покажуваат опасно лизгање кон познатите пристапи на ВМРО-ДПМНЕ. Оваа политичка опсесија со ДУИ произлегува од две главни причини. Прво, обидот да се изгради политички идентитет преку ДУИ како единствената партија со јасен идеолошки и политички идентитет на политичката сцена во Северна Македонија. Во политичка средина каде што многу партии ги менуваат ставовите според моменталните интереси, ДУИ има изградено конзистентна визија и испорачано конкретни резултати кои позитивно влијаеле на сите граѓани“, соопшти ДУИ.
Оваа конзистентност, се додава, претставува силен контраст на јасниот недостиг од визија кај другите партии, кои се обидуваат да го изградат својот идентитет преку напади врз ДУИ.
„Второ, користењето на реториката против ДУИ е одраз на длабоко вкоренетата албанофобија во дел од македонската политичка сцена. Наместо да промовираат еднаквост и соработка, некои партии се обидуваат да ги мобилизираат своите поддржувачи преку таргетирање на Албанците и нивните политички претставници. Овој пристап е доказ за политичката слабост и недостатокот на идеи за изградба на подобра иднина за сите граѓани“, се вели во соопштението.
ДУИ не била и не е проблем за оние кои бараат јасна визија и праведна и еднаква држава, додава партијата.
„Напротив, ние секогаш сме биле гаранти на стабилноста и промотори на евроатлантските реформи. Нашиот успех, базиран на 15 последователни изборни победи, не е причина за создавање опсесии, туку за размислување за недостатокот на визија и резултати кај другите партии. Ако Филипче и неговата партија сакаат да изградат подобра иднина за граѓаните, треба да ги прекинат обидите за копирање на раздорните пристапи од минатото и да се фокусираат на изградба на наратив што ги обединува граѓаните и ја промовира стабилноста. Албанците и граѓаните на оваа земја добро знаат дека ДУИ е приказна за успех, а успесите не можат да ги оправдаат неуспесите на другите. Користењето на потрошената анти-ДУИ реторика не му помага ниту на Филипче, ниту на неговата партија, а сигурно ниту на Северна Македонија. Албанците и граѓаните бараат стабилност, прогрес и визија“, се вели во соопштението на опозициската ДУИ.