Филипче: Пристигнуваат 2.000 кинески вакцини, ќе ја ограничиме сумата за лекување ковид-пациенти во приватните болници

Денеска ќе пристигнат 2.000 кинески вакцини на аеродромот во Софија, а нашето возило веќе е на пат кон Бугарија за да ги донесе вакцините, рече министерот за здравство, Венко Филипче, на денешната прес-конференција во спортската сала „Борис Трајковски“ каде што во моментов се вакцинираат медиумските работници и новинарите.

– Денеска ќе пристигнат 2.000 кинески вакцини на аеродромот во Софија, а нашето возило е веќе на пат кон Бугарија за да ги донесе тие вакцини. Овие дози ќе бидат додадени на сегашниот систем за вакцинација. Хронично болните ќе се вакцинираат согласно возрасната група, а во секоја возрасна категорија над 50 години е огромна бројката на пациенти со хронични болести. Апелирам да има трпение, системот функционира – рече Филипче.

Тој посочи дека до Владата е поднесен предлог за измена на Законот за здравствена заштита, со кој се предвидува ограничување на висината на наплата на финансиски средства за пациенти кои се лекуваат од коронавирус.

– Денеска на главниот координатор на кризен штаб се дискутираа повеќе работи. Се донесе одлука да се направи измена во Законот за здравствена заштита со кој на приватните болници ќе се направи ограничување на висината на наплата додека трае кризата, поточно за лекување на коронавирус. Го слушнавме апелот на граѓаните, и веќе утре на Владата ќе го поднесеме предлог-законот за здравствена заштита – рече Филипче.

Министерот истакна дека досега 25.000 граѓани се вакцинирани против ковид-19, а како што рече, трендот на новозаразени во последните неколку дена опаѓа, а исто така се ослободуваат кревети во болниците.

– Околу 25.000 граѓани веќе се вакцинирани против ковид-19. Процесот за вакцинација одлично се спроведува. Забележуваме пад на трендот на новозаразени во последниот период, во последното деноноќие имаше околу 300 новозаразени, иако, очекувано беше бројката да биде мала за време на викендот. Сепак, целосната слика ќе ја видиме во утрешната статистика. Битола стана регионален центар и затоа има поголем број случаи со новозаразени. Ја следиме ситуацијата и ги пратиме бројките на дневно и на неделно ниво – истакна министерот.

Претседателот на Здружението на новинари (ЗНМ), Младен Чадиковски, рече дека над 600 медиумски работници денеска ја примиле првата доза од вакцината против ковид-19.

– Денеска се вакцинираа новинарите на возраст над 40 години и лица со хронични болести. Се надеваме дека во следната фаза ќе бидат опфатени сите медиумски работници кои работат на терен и кои имаат контакт со многу луѓе. Ова ќе биде заштита не само за личното здравје, туку и заштита за целото население кое е во контакт со новинарите. Во медиумите постојано гравитираат многу луѓе, така што, апелираме за што помасовна вакцинација. Секој од нас треба да испука еден куршум во војната против пандемијата – рече Чадиковски.