Филипче пратил инспектори во „8 Септември“, ама имало и пациенти над 70 години

Министерот за здравство д-р Венко Филипче рано утрово побара од ДСЗИ да извршат вонреден инспекциски надзор за утврдување на возраста на пациентите хоспитализирани во ГОБ „8 Септември“, откако на социјалните мрежи и во медиуми излезе информација дека пациентка кој требало да се хоспитализира во ковид центарот во таа болница била вратена поради нејзината возраст, соопшти Министерството за здравство.

Вчера објавивме сведоштво на ќерка чија мајка иако била позитивна на ковид-19 не била хоспитализирана во ГОБ „8 Септември“ поради возраста.

ДСЗИ попладнево го информирало министерот Филипче дека по извршениот надзор е утврдено дека во ГОБ „8 Септември“ од 107 лежечки пациенти, 38 се на возраст од 68 до 88 години.

– Министерот разговараше и телефонски со д-р Христијан Костов, директор на ГОБ „8 Септември“. Според д-р Костов, во моментов во ГОБ „8 Септември“, најмладиот ковид пациент е на 20-годишна возраст, а хоспитализирани се и пациенти над 72 години. Костов појаснил дека пациент не може да биде вратен, единствено може да биде препратен во друг ковид центар доколку во ГОБ „8 Септември“ нема слободен кревет, а додека пациентот чека да биде пренесен во друга болница, му се прават потребните анализи и со амбулантно возило се носи во ковид центарот каде има слободен кревет за да биде хоспитализиран – велат од Здравство.

Министерот Филипче потенцира дека хоспитализацијата на пациентите во ниту еден случај не зависи од нивната возраст. Секој пациент, без разлика колку години е, има подеднакво право на болничка нега и третман, додаваат од Министерството.