Филипче: Моментално нема потреба да се ангажираат пензионирани лекари
Министерот за здравство вели дека нема невработен или неангажиран лекар. Сите млади лиценцирани лекари веќе се ангажирани и помагаат во некоја област.
Моментално не планираме и нема потреба да ги повикаме пензионираните лекари да помогнат во борбата со коронавирусот, изјави денеска министерот за здравство Венко Филипче.
Тој рече дека моментално нема невработен или неангажиран лекар.
Можеби ќе ве интересира
– Сите млади лиценцирани лекари веќе се ангажирани и помагаат во некоја област. Имавме состанок со 55 лекари приватни интернисти, десетина веќе се пријавени и се ставија во функција. Во таа смисла нема потреба од пензионираните лекари. Во некои земји ги враќаат на работа лекарите кои се дијагностицирани со ковид-19, а се асимптоматски. Кај нас сè уште нема потреба од нивно ангажирање, ниту од пензионираните лекари рече Филипче денеска во Струмица.
Тој не можеше да каже кога ќе профункционира првиот кат од новото болничко крило на Струмичката болница за третман и лекување на ковид пациенти.
– Проблемот со кадар е присутен на територијата на цела држава. Дури и болниците во Скопје го имаат проблемот во сите клиники. Има само 50-тина инфектолози- рече Филипче.