Филипче: Ако мерките не се почитуваат, ќе има рестрикција во движењето

Доколку мерките за заштита од ковид-19 не дадат резултат, ќе има препорака за рестрикција во движењето, изјави министерот за здравство Венко Филипче во вестите на телевизија Канал 5.

Филипче рече дека болничките капацитети се пополнуваат и дека лекарите и сестрите се под притисок. Но, тие се мотивирани, работат и нема да се случи болните од ковид да останат без медицинска нега.

Заради очекуваниот есенски бран и зголемениот број на нови случаи, Филипче истакна дека Комисијата за заразни болести предложи до Владата нови рестриктивни мерки како задолжително носење маска на отворено, забрането групирање на повеќе од 4 лица по 22 часот. Зголемени се сите ингеренции на сите инспекторати, што работат на терен и пакетот на дополнителна рестрикција и ингеренции ќе даде резултати.

– Искрено верувам дека овие мерки ќе дадат резултат. Но, доколку не дадат сигурно дека ќе има препорака за рестрикција во движење. Најпрво скратување на работните часови на одредени економски субјекти, угостителски објекти итн., но и рестрикција во движењето. Видовме какви искуства имаа некои земји кои нагло ги отворија градинките и училиштата. Затоа ние поучени од тоа, постепено ги отворивме училиштата. Но, тие земји се соочија со еден нагол скок на случаи, нагло оптеретување на болничките капацитети, како во Израел, каде мораа да воведат рестрикција во движењето. Тоа ќе следи ако имаме и понатаму зголемување на бројот на дијагностицирани случаи и дополнително оптоварување на болничките капацитети – потенцираше Филипче.

Во однос на обвинувањата од страна на опозицијата, тој посочи дека единствено се обидуваат политички да поентираат и немаат никаков аналитички концепт, ниту пак намера нешто добро или квалитетно да препорачаат.