ФИЛИП (12) ИМА АУТИЗАМ, СЛИКАРСКИ ТАЛЕНТ И ВАЖНА ПОРАКА Верувајте во себе, слушајте го срцето и следете ги соништата
Аутизмот погаѓа милиони луѓе ширум светот, влијаејќи во различен степен на нивните социјални, комуникациски и бихејвиорални вештини. Слушнете што има да каже 12-годишниот Филип Циглењак Симоновски, дете со аутизам и со сликарски талент, по повод светскиот ден на аутизмот – 2 април
Светскиот ден на свесност за аутизмот е меѓународно одбележување посветено на подигање на свеста за нарушувањето од спектарот на аутизам (ASD) и промовирање на прифаќањето, вклучувањето и поддршката за лицата со аутизам.
Овој ден е можност да се едуцира јавноста за предизвиците и силните страни на луѓето од спектарот на аутизам, да се прослави придонесот на лицата со аутизам и да се заговара нивно поголемо разбирање и прифаќање во општеството.
Погледнете го видеото (ТУКА) и слушнете што ни порачува 12-годишниот Филип Циглењак Симоновски, дете со аутизам, но и со голем сликарски талент, дете кое зад себе има дури 4 самостојни изложби.
Како вовед за видеото, во својата објава од 31 март, на Фејсбук, неговата мајка Ана Марија Циглењак, вели: Од утре започнува месецот за подигнување на свеста за аутизмот. Носиме сино и зборуваме гласно. Не на 2-ри април, туку ден претходно, ден подоцна, цела година, секогаш. Приказните на Филип немаат крај, но за жал не секогаш и мислата има вербален тек, па затоа лепевме, сечевме и дотеравме една најубава порака. Небото е лимит!
А ние би додале: можеби лепеле и сечеле кога ја снимале пораката на Филип за да звучи подобро, но кога ги слика своите акрили, на неговите платна не им треба ниту лепење, ниту сечење, ниту какви било поправки.
Видео-пораката на Филип и дел од неговото творештво можете да ги најдете ТУКА.