ФЕРГИ ПОВЕЌЕ НЕ Е ВОЈВОТКА Поранешната сопруга на принцот Ендру ја отстрани титулата од социјалните мрежи

Принцот Ендру (65), пред неколку дена објави дека ќе се откаже од користењето на своите кралски титули и почести, вклучително и од титулата „војвода од Јорк“, а PEOPLE пишува дека и неговата поранешна сопруга, Сара Фергусон (66), повеќе нема да ја користи својата титула „војвотка од Јорк“.
Ферги, како што е популарно позната, оттогаш го смени своето корисничко име од „@SarahTheDuchess“ во „@sarahMFergie15“.

Кралицата Елизабета го прогласи својот втор син за војвода од Јорк кога се ожени со Сара во 1986 година, со што таа стана војвотка од Јорк. Иако се разделија во март 1992 година и официјално се разведоа четири години подоцна, Ферги ја задржа својата титула.

И покрај разводот, Ендру и Сара останаа во добри односи и заедно ги одгледаа ќерките, принцезите Беатрис и Јуџини и продолжија да живеат заедно во Ројал Лоџ во Виндзор.

Ферги го поддржуваше принцот Ендру и среде скандалот поврзан со неговото пријателство со Џефри Епстин, што доведе до негово повлекување од кралските должности во 2019 година и одземање на воените почести и покровителства во 2022 година.

Одлуката на принцот Ендру да се откаже од титулите доаѓа среде обновените критики поради неговата поврзаност со Епстин, кој почина во затвор во 2019 година додека чекаше судење. Минатиот месец неколку добротворни организации ги прекинаа врските со Сара откако во јавноста протече нејзиниот мејл до Епстин од 2011 година. Во пораката, наводно, го пофалила како „постојан, дарежлив и врвен пријател“, и тоа откако јавно се одрече од него во едно интервју.

Според нов извештај, Епстин во друг мејл од 2011 година му рекол на својот адвокат дека Сара „прва го прославила неговото пуштање на слобода со своите две ќерки“. Во времето на излегувањето на Епстин од затвор во 2009 година, Беатрис имала 20, а Јуџини 19 години. Извор близок до семејството тврди дека Беатрис и Јуџини никогаш не го запознале Епстин и дека не се сеќаваат на таква посета.