Фатен лихвар од Велес, се заканувал за баснословни камати

  Полициски службеници од СВР Велес, вчера околу 15.40 минути на улицата Петре Прличко во Велес,  го лишиле од слобода 44-годишниот велешанец А.С. поради сомнение за сторено кривично дело лихварство.

Тој бил лишен од слобода  при земање обележани банкноти, а по претходна пријава на 33-годишен маж од Велес дека во периодот од мај 2020 до април 2021 година за земени 100 евра во денарска противвредност поради притисоци и закани на А.С. му вратил околу 30 илјади денари, а му побарувал уште 90 илјади денари како камата, информира портпаролот Верољуб Додевски.

Врз основа на судска наредба, бил извршен и претрес во домот на А.С. при што биле пронајдени и одземени четири мобилни телефони и документација (нотарски акти за недвижен имот и уплатници за трансфер на парични средства во износ од околу 4 милиони  денари).

Додевски информира дека лихварот е бил приведен во полициска станица и по целосно документирање и расчистување на случајот против него ќе биде поднесена соодветна пријава.