ФАЛСИФИКУВАЛ ЕВРА И ФРАНЦИ ВО ШИПКОВИЦА Имал и автоматска пушка со муниција
При претрес во неговиот дом, полициските службеници пронашле и фалсификувани пари во вкупен износ од 4.020 евра и 300 франци.
Основното јавно обвинителство Тетово донесе Наредба за спроведување истражна постапка против едно лице за кое постои основано сомнение дека сторило кривични дела – Неовластено изработување, држење, посредување и тргување со оружје и експлозивни материи од член 396 и Фалсификување пари од член 261 од Кривичниот законик, соопшти јавното обвинителство.
„Осомничениот, во својата куќа во селото Шипковица, неовластено држел автоматска пушка и две рамки со 12 куршуми со калибар 7,62мм. При претрес во неговиот дом, полициските службеници пронашле и фалсификувани парични средства во вкупен износ од 4.020 евра и 300 франци, кои осомничениот ги фалсификувал со намера да ги пушти во оптек“ – се вели во соопштението.
Јавниот обвинител до судијата на претходна постапка доставил предлог за определување мерка притвор за осомничениот.