Фали еден глас за влада – што ќе договорат денеска Ахмети и Меџити?

Али Ахмети и Изет Меџити ќе најдат заеднички јазик, е еден од ставовите на сопартијци на двајцата функционери од врвот на ДУИ. По одделните средби кои се закажани за денеска попладне на Ахмети со Меџити и со градоначалникот на Сарај, Блерим Беџети, се очекува сѐ да биде појасно.

До пладне нема поместување на позициите помеѓу лидерот и потпретседателот за настојувањето на Меџити тој да предложи вицепремиер, со што би се истумбала и министерската листа, односно Бујар Османи да не биде министер, а на негово место во МНР да дојде Артан Груби.

– Ахмети и Меџити ќе најдат заеднички јазик, кој ќе биде исходот не знам, ама знам дека потпретседателот му е најдобар соработник и другар на Ахмети од Скопје. Никогаш се немаат скарано. Тој му е „мало синче“. Сметам дека Ахмети ќе го убеди Меџити листата да остане непроменета – вели функционер од ДУИ.

Други сопартијци на Ахмети и Меџити сметаат дека работата отишла предалеку, виси изборот на новата влада и поради тоа Меџити ќе настојува да го истурка својот предлог за вицепремиер, во спротивно според нив, тој нема да ја гласа новата влада.

Ако нема приближување на позициите помеѓу лидерот и потпретседателот, се наметнува дилемата дали Ахмети ќе работи на убедување на пратеничка од чаирскиот огранок која го поддржува Меџити, бидејќи освен на потпретседателот, клучен е гласот на пратеничката за избор на новата влада. Без Меџити парламентарното мнозинство има 61 глас, доволно да помине изборот на владата, но без гласот на пратеничката – нема влада. Информациите говорат дека токму пратеничката ќе биде мостот за надминување на кавгата меѓу Ахмети и Меџити. Меџити да гласа против, а пратеничката да го обезбеди изборот на новата влада.

Расколот помеѓу Ахмети и Меџити настана откако лидрот ја објави министерската листа на која се најдоа двајцата функционери од Чаир, Османи и Груби како кандидати за министри. Според функционери на ДУИ, револтот на Меџити не е лично до Османи, туку повеќе е принципиелен, бидејќи тој како потпретседател на партијата и претседател на чаирскиот огранок не бил консултиран за предлозите за министри. Освен што се надевал дека ќе биде прашан, Меџити очекувал тој да номинира кандидат за министер, бидејќи победата на парламентарните избори за Скопје ја одработиле тој и Беџети.

Коментарите во кулоарите се дека и лидерот и потпретседателот отишле предалку. Досега имало недоразбирања и кавги меѓу лидерот и сопартијците, но никој јавно не му опонирал како сега Меџити во врска со гласањето на новата влада. Ако Меџити се повлече, според сопартијците, допрва ќе биде проблематично функционирањето на министрите со пратеничката група, која ќе ја координира токму Меџити.