ЕВТИНИОТ ЈАЧМЕН ЈА НАМАЛИ ЦЕНАТА НА СВИЊИТЕ Килограм жива мера без ДДВ оди за 125 денари
По африканската чума и големото намалување на фондот голем број фарми се обновуваат.
Цената на свинското месо жива мера е намалена за 20 денари за килограми. Гоце Сарафимов одгледувач на свињи и потпретседател на Асоцијација на земјоделци вели дека ова се должи на ниската откупна цена на житариците, односно на јачменот.
-Цената на свинско месо жива мера уште е поволна, иако сега е малку падната, од 140-150 денари на 125-120 денари, плус 5% данок. Меѓутоа добра е и таа цена во моментов, не е загрозувачка за одгледувачите на свињи- вели Сарафимов.
Според него, исплатливо е одгледувањето на свињи, имајќи предвид дека годинава откупната цена на сточната храна беше ниска, односно јачменот го откупуваа за 9 или 10 денари по килограм.
Тој додава дека по африканската чума е намален бројот на свињи во земјава, но не во голем обем, бидејќи голем дел од одгледувачите ги обновуваат своите свињарски фарми.
-Моментално се обновуваат сите тие фарми, кои беа зафатени со африканска свинска чума, што значи дека пазарот е задоволен од свинско месо – изјави Сарафимов.
Тој посочува дека во месарите има мало намалување на свинското месо за крајните потрошувачи.