ЕВРОПСКАТА ЦЕНТРАЛНА БАНКА ГИ НАМАЛИ КАМАТИТЕ Референтната каматна стапка падна на 4,25%
Европската централна банка ја намали основната каматна стапка за прв пат во последните пет години, намалувајќи го притисокот врз граѓаните кои имаат кредити во целата еврозона.
Европската централна банка ја намали референтната каматна стапка за главните операции за рефинансирање на 4,25 %, каматната стапка на депозитите на 3,75% и маргиналната каматна стапка на 4,50%.
Сите три основни каматни стапки беа намалени за по 25 базични поени, а стапуваат на сила на 12 јуни.
„Врз основа на ажурираната оценка за изгледите за инфлација, динамиката на базичната инфлација и силата на преносот на монетарната политика, сега е соодветно да се олесни степенот на ограничувањата на монетарната политика по девет месеци задржување на стапките на стабилно ниво. Од состанокот на Управниот совет во септември 2023 година, инфлацијата опадна за повеќе од 2,5 процентни поени, а изгледите за инфлацијата значително се подобрија. Базичната инфлација, исто така, се намали, што ги зајакна знаците дека ценовните притисоци се намалија и инфлаторните очекувања се намалија насекаде. Монетарната политика задржа рестриктивни услови за финансирање. Со намалувањето на побарувачката и одржувањето на инфлаторните очекувања на добро ниво, ова даде голем придонес за намалување на инфлацијата“, се вели во соопштението на ЕЦБ.
Потегот на ЕЦБ следи по вчерашната одлука на Канада да ја намали официјалната каматна стапка.
Би-би-си коментира дека Европската централна банка ги намали каматните стапки додека гласачите се упатуваат кон гласачките места за изборите низ ЕУ во следните четири дена.