Европска комисија: Не прифаќаме забрани за патувања

Европската комисија најавила дека ќе испрати писмо до државите членки за да ги предупреди да ги почитуваат заеднички договорените насоки за ограничување на патувањата и дека забраната за патувања кои некои членки ја увеле е неприфатлива.

– Земјите членки би требало силно да ги обесхрабрат неважните патувања од темноцрвените зони и во нив, но треба да се избегне затворање на границите – изјавил портпаролот Кристиан Виганд.

Германија еднострано ги затвори границите кон Австрија, а Белгија ја продолжила забраната за сите неважни патувања до 1 април.

Портпаролот додал дека сите земји членки го поддржале предлогот на Комисијата за заеднички координиран пристап за ограничувањата на движење во контекст на борбата против пандемијата од коронавирусот и дека секое непридржување на договорениот пристап создава проблеми во слободното движење.

– Државите членки можат да преземат мерки за запирање на ширењето на заразата, но тие мерки мора да бидат пропорционални и недискриминирачки за граѓаните на ЕУ – додал Виганд.

На прашањето дали белгиските и германските мерки се пропорционални, тој рекол дека одговорот на тоа прашање не е така едноставен.