ЕВРОПЕЈЦИТЕ ИЗБИРААТ КАКО ДА ИЗГЛЕДААТ ЕВРО- БАНКНОТИТЕ ВО ИДНИНА Предложени се 10 различни дизајни

Европската централна банка (ЕЦБ) ги презентираше предлозите за дизајн на новата серија евро банкноти кои влегоа во потесниот избор и започна јавна консултација во која ги поканува граѓаните од цела Европа да го искажат своето мислење.

Предлозите се базираат на две теми – „Европска култура“ и „Реки и птици“ – и мотивите избрани за нивна презентација.

– Евро банкнотите не се само средство за плаќање – тие се еден од најопипливите изрази на Европа. Со дизајн кој ги комбинира убавината и значењето, тој дополнително ќе го зајакне нашиот заеднички идентитет – рече претседателката на ЕЦБ, Кристин Лагард.

Предлозите кои влегоа во потесниот избор се резултат на натпревар за дизајн спроведен на ниво на Европската Унија. Примени се повеќе од 1.200 апликации од графички дизајнери, а 25 од нив беа поканети да дадат предлози за една или двете теми.

Независно жири, составено од 21 експерт од областите на графички дизајн, комуникации, невронаука и историја, кои беа номинирани од централните банки на земјите од еврозоната, избра десет предлози.

Сега сите европски граѓани се поканети да го дадат своето мислење, откако Управниот совет на ЕЦБ одлучи да спроведе онлајн анкета за десетте предлози. Јавната консултација ќе биде отворена до 21 септември 2026 година. Паралелно, независна истражувачка компанија ќе спроведе посебна анкета со истите прашања на репрезентативен примерок од граѓаните на еврозоната.

ЕЦБ ќе објави извештај за резултатите од двете студии откако ќе се избере конечниот концепт за дизајн. Повратните информации од граѓаните се клучен дел од инклузивниот пристап на Евросистемот за да се обезбеди дека ставовите на луѓето низ цела Европа се земени предвид.

Се очекува Управниот совет на ЕЦБ да донесе конечна одлука за новиот дизајн на банкнотите на крајот од оваа година. Одлуката ќе се базира на неколку елементи, вклучувајќи ги заклучоците на жирито за натпреварот за дизајн, техничката проценка и резултатите од две анкети.

Избраниот дизајн потоа ќе помине низ понатамошен развој и тестирање пред да започне производството. Се очекува новите евро банкноти да влезат во оптек во следните години. Банкнотите од постојните серии ќе ја задржат својата вредност и ќе продолжат да бидат во оптек заедно со новите. Ова ќе биде првото целосно редизајнирање на евро банкнотите од нивното воведување во 2002 година.

-Редизајнот на евро банкнотите е дел од долгорочните напори на eвросистемот да обезбеди готовината да остане безбедно, ефикасно и блиско до граѓаните средство за плаќање, со што ќе се зачува пристапот до јавни пари и слободата за избор на методи на плаќање – изјави членот на Извршниот одбор на ЕЦБ, Пјеро Чиполоне.