ЕВРОПА САКА МЕЃУНАРОДНИ ВОЕНИ СИЛИ ВО УКРАИНА Заедничка декларација од самитот во Берлин
Во усвоената заедничка декларација има повеќе точки кои се однесуваат на прекин на огнот и на безбедноста на Украина, а ветени се и обемни инвестиции во економската и материјалната реконструкција на земјата.
Во Берлин, во текот на изминатите два дена, во различни кругови се дискутираше за мировно решение за војната во Украина. Во понеделникот вечерта, во кабинетот на германскиот канцелар се одржа самит на европски шефови на држави или на влади. Група од вкупно дванаесет политичари објавија заедничка изјава. Во декларацијата се наведува дека и САД и шефовите на држави или на влади од Европа се изјасниле за соработка со цел да ѝ обезбедат на Украина цврсти безбедносни гаранции и мерки за поддршка за економска обнова.
Овa се најважните точки од заедничката декларација:
Формирање мултинационални сили за обезбедување прекин на огнот во Украина: Силите, кои ќе бидат предводени од Европа и поддржани од САД, ќе ги поддржуваат вооружените сили на земјата, и ќе ја гарантираат безбедноста на воздушниот простор и морето. Во изјавата конкретно се наведува дека ова треба да се случи „и преку операции во Украина“.
„Континуирана и значајна поддршка“ на вооружените сили на Украина. Цел е да се создаде армија од 800.000 војници во мирно време. Таа би требало да служи за одвраќање и да овозможи одбрана.
Механизам за следење на прекинот на огнот, предводен од САД и со меѓународно учество, треба да служи како рано предупредување за идни напади. Треба да биде можно да се следи и да се реагира на потенцијални прекршувања на прекинот на огнот. Механизам за намалување на конфликтите треба да разработи взаемни мерки за деескалација.
Покрај тоа, се зборува за „правосилна обврска“. Во случај на иден вооружен напад, со тоа би се преземале „мерки за повторно воспоставување на мирот и безбедноста“. Конкретно се споменува употреба на вооружени сили, разузнавачка и логистичка поддршка, како и економски и дипломатски мерки.
Ветени се и обемни инвестиции во економската и материјалната реконструкција на Украина. Исто така, се зборува за меѓусебно корисни трговски договори „и земање предвид на потребата Русија да ја надомести штетата предизвикана на Украина“. Во овој контекст, се спомнува и рускиот имот замрзнат во ЕУ.