ЕВРОПА РАЗМИСЛУВА ДА ГИ ЗАБРАНИ ЕЛЕКТРОНСКИТЕ РАЧКИ НА АВТОМОБИЛИТЕ Во случај на несреќа ги блокираат вратите

Европската Унија размислува да ги забрани електронски контролираните рачки на вратите што се извлекуваат на автомобилите. Кина веќе одлучи да ги забрани од јануари 2027 година.

Причината за оваа мерка е зголемениот број несреќи во кои патниците биле заробени во возилото бидејќи рачките на вратите не можеле да излезат од каросеријата, па вратите не можеле да се отворат однадвор или одвнатре.

Ваквите случаи веќе се истражуваат во неколку европски земји, вклучувајќи ги Холандија, Германија и Велика Британија. Во еден од најсериозните инциденти, што се случи минатиот септември во Шверте во близина на Дортмунд, 57-годишен возач на Тесла ја изгубил контролата додека престигнувал, удрил во дрво, а автомобилот веднаш се запалил. Патниците не можеле да излезат бидејќи рачките внатре не работеле, а минувачите не можеле да ги отворат вратите однадвор бидејќи рачките не се појавиле. Додека пристигнале службите за итни случаи, било предоцна, возачот и две деветгодишни деца загинале, додека друго дете успеало да избега од возилото и било пренесено со хеликоптер во болница.

Електронските рачки на вратите влегоа во масовно производство уште во 2012 година со Tesla Model S, а денес се наоѓаат на околу 60% од новите електрични и plug-in хибридни модели во ЕУ. Tesla продаде повеќе од 3 милиони автомобили со вакви рачки само во Кина, а минатата година возилата со ова решение достигнаа удел од околу 39% од сите нови електрични и plug-in хибридни возила на кинескиот пазар.

Скриените, вдлабнати рачки сега се стандардни и кај многу луксузни електрични модели – од Ni и Li Auto до Xiaomi и Xpeng.

Производителите ваквите рачки ги оправдуваат со аеродинамика и поголем дострел, но анализите покажуваат дека добивката во пракса е скромна – само пет до десет километри. Не станува збор ниту за заштеда во производството, бидејќи електронските системи се многу пати поскапи од класичните механички рачки на вратите. Затоа сè почесто се вели дека тоа е првенствено тренд и дизајнерски каприц.

Кина беше првата што одлучи да донесе регулатива со која се бара рачките на вратите на сите странични врати да имаат отвор за прсти со димензии од најмалку 6 x 2 x 2,5 сантиметри и механичка врска со бравата.

Во кабината мора да има јасно означена точка за итно отклучување, а системот мора автоматски да ги отклучува вратите во случај на активирање на воздушните перничиња или прегревање на батеријата.