ЕУ МУ ВОЗВРАЌА НА ТРАМП СО ЦАРИНИ ЗА БУРБОН, ФАРМЕРКИ И ЗА МОТОЦИКЛИ Почна ли трговската војна меѓу САД и Европа?

Европската Унија реагираше брзо на новите царини на претседателот на САД, Доналд Трамп, од 25% за увоз на челик и на алуминиум, кои стапија на сила во средата, возвраќајќи со свои казнени контрамерки кои рече дека се потребни за заштита на потрошувачите и на бизнисите, објави Си-Ен-Би-Си.

Белата куќа ја потврди одлуката – која ќе влијае на Канада, Австралија, ЕУ и на други – доцна во вторникот, но рече дека Трамп веќе не планира да ги зголеми царините за металите од Канада на 50%.

Царини за бурбон, фармерки, мотоцикли, путер од кикиритки…

ЕУ реагираше брзо, велејќи дека ќе воведе царини за американски стоки во вредност од 26 милијарди евра (28,33 милијарди долари). Како што соопшти утрово Европската комисија, како прв чекор, од април повторно ќе бидат воведени дополнителни царини на ЕУ за увоз на американски производи како бурбон виски, фармерки, мотоцикли, чамци и путер од кикиритки, објави Eн-Пи-Ар.

Претседателката на Европската комисија, Урсула фон дер Лајен, во средата им рече на новинарите дека ЕУ „мора да дејствува за да ги заштити бизнисите и потрошувачите“.

Царините не се добри за никого

– Длабоко жалиме за оваа мерка (од страна на САД). Царините се лоши за бизнисот и уште полоши за потрошувачите, ги нарушуваат синџирите на снабдување, внесуваат несигурност во економијата – работни места се во прашање, цените се зголемуваат и тоа никому не треба, тоа не ѝ треба на ниедна страна – рече таа за време на прес-конференција.

Трговските врски меѓу САД и ЕУ се „најголеми во светот“, рече Фон дер Лејен, а тој однос им донесе „просперитет и безбедност на милиони луѓе“, а овозможи и отворање работни места на двете страни на Атлантикот.

– Ние секогаш ќе останеме отворени за преговори – додаде таа во изјавата.

ЕУ соопшти дека царините од страна на САД ќе влијаат на извозот на ЕУ во САД во вредност од 26 милијарди евра (28,3 милијарди), дека тие се однесуваат на индустриски челик и алуминиум, други полуготови и готови производи од челик и од алуминиум, како и на нивните деривати на комерцијални производи, како што се делови за машини и игли за плетење.

Ова е почеток на трговска војна?

Ова го означува најновиот развој на трговската војна која беше обележана со храбри ветувања за царини и со последователни одложувања од страна на Трамп.

Трговските тензии ги погодија пазарите во последниве денови, во услови на зголемена загриженост дека давачките би можеле да ја турнат најголемата светска економија кон рецесија.

За разлика од Мексико, Канада и Кина, производите со потекло од ЕУ не беа погодени од царините на Трамп сѐ додека царините за челик и алуминиум не стапија на сила во средата.

Тензиите меѓу Вашингтон и Брисел тлееја по инаугурацијата на Трамп во јануари кога лидерот на Белата куќа веднаш ја сигнализираше својата намера да воведе царини на блокот.

– Тие навистина нѐ искористија. Тие не ги прифаќаат нашите автомобили, во суштина не ги прифаќаат нашите земјоделски производи. Тие даваат секакви оправдувања зошто не ги прифаќаат, а ние прифаќаме сè од нив – рече Трамп на состанокот на Кабинетот на 26 февруари.

Еден од најголемите проблеми на Трамп е трговскиот дефицит на САД со голем број клучни трговски партнери, вклучувајќи ги Канада и ЕУ.

Податоците на Европската комисија покажуваат дека ЕУ имала трговски суфицит од 155,8 милијарди евра (159,6 милијарди долари) со САД за стоки во 2023 година, но имала дефицит од 104 милијарди евра на услуги. Генерално, ЕУ-САД трговијата со стоки и услуги во 2023 година била вредна 1,6 трилиони евра (1,68 трилиони долари), според ЕУ.

Машините и возилата го сочинуваат најголемиот дел од извозот на ЕУ во САД по група производи, проследени со хемикалии, други производни стоки и медицински и фармацевтски производи.