ЕСМ ГО ПРАЌА ДИРЕКТОРОТ ДА ВИДИ КАДЕ ЗАСТАНА ТРАНСФОРМАТОРОТ Испораката од Турција доцни две недели, се бараат посебни дозволи

ЕСМ го праќа во Турција својот комерцијален директор Ардијан Муча за да види каде е застаната набавката на новиот трансформатор за Блок 3 во РЕК Битола, кој требаше да биде оперативен уште на 22 ноември, открива премиерот Димитар Ковачевски велејќи дека се работи за работните дозволи од турска и од грчка страна.

– Веќе почнуваат монтажните активности на блокот 3 во РЕК Битола, со оглед на тоа дека дел од опремата е пристигната, а денеска комерцијалниот директор на ЕСМ е во Турција со цел да се доорганизира транспортот на трансформаторот со оглед на различните транспортни дозволи кои што треба да се добијат од турската страна и од грчка страна – изјави Ковачевски.

Трансформаторот кој тежи 240 тони бара посебни услови за транспорт, а ќе биде пренесуван во композицијата долга 60 метри.