ЕРМЕНСКИОТ АРХИЕПИСКОП ПРЕДВОДЕЛ ТЕРОРИСТИЧКИ ЗАГОВОР ЗА ДРЖАВЕН УДАР Регрутирал над 1.000 следбеници за насилно преземање на власта
Архиепископот Баграт Галстанјан самиот ги регрутирал своите следбеници, а најголем дел од нив биле поранешни припадници на војската и на полицијата. Тие биле дел од „убиствени тимови“ со јасно определена задача – од предизвикување улични судири и блокирање патишта, до парализирање на сообраќајот, поставување експлозивни направи и извршување други тешки кривични дела, сè со цел предизвикување хаос, страв и насилно преземање на власта.
Ерменските власти соопштија дека осуетиле терористички заговор од страна на членови на протестно движење, предводено од архиепископот Баграт Галстанјан, објави ерменската агенција Арменпрес.
Ерменската истражна служба издаде соопштение во кое се наведува дека осомничените планирале терористички напади и државен удар од ноември минатата година.
Француските медиуми забележуваат дека Галстанјан ги предводеше минатогодишните протести со кои се бараше оставка од ерменскиот премиер, Никол Пашинјан, поради неговата политика кон Азербејџан.
Движењето, предводено од Галстанјан, е познато како „Сербазан Пајкар“ (Света борба), кое од средината на минатата година започна да ги организира антивладините демонстрации.
„Агенциите за спроведување на законот осуетија голем и подмолен ‘криминално-олигархско-свештенички’ план за дестабилизација на Република Ерменија и за узурпирање на власта“, рече Пашинјан на социјалните медиуми.
Властите соопштија дека Галстанјан самиот ги регрутирал своите следбеници за да формира „екипи за удар“ за извршување терористички акции, насочени кон соборување на владата и преземање на власта.
Осомничените биле регрутирани првенствено од поранешни воени лица и поранешни полицајци за да се приклучат на убиствените тимови од по 25 лица. Формирани се до 250 такви тимови, секој со специфични цели, како што се поттикнување судири, блокирање патишта, парализирање на сообраќајот низ целата земја, предизвикување експлозии и други кривични дела со цел создавање паника, нереди и преземање на власта.
Властите наведуваат дека групата од јануари досега регрутирала повеќе од 1.000 луѓе и веќе набавила експлозиви за своите акции.
Заговорот бил откриен од Националната безбедносна служба.