ЕКСПЛОЗИИ ОДЕКНАА ВО КИЕВ И ВО ПОГОЛЕМИТЕ УКРАИНСКИ ГРАДОВИ Русите возвраќаат за нападот врз Црноморската флота во Крим

Најмалку две експлозии беа пријавени во Киев. Еден жител изјави за Би-Би-Си дека неговата област сега е без струја. Во североисточниот град Харков погодени се критични инфраструктурни објекти, соопштија локалните власти.

Нападите доаѓаат откако Русија ја обвини Украина за напад со беспилотни летала врз нејзината Црноморска флота во анектираниот Крим. Утринава ракетни напади беа пријавени и во централниот регион Виница, како и во Дњепропетровск и во Запорожје на југоисток и Лавов во западна Украина.

Портпаролот на украинските воздухопловни сили Јуриј Ихнат изјави за украинската телевизија дека Русија ги користела своите стратешки бомбардери за да го изврши нападот. Андриј Јеркмак, шеф на кабинетот на претседателот Володимир Зеленски, рече дека „руските губитници продолжуваат да се борат против мирните објекти“.

Во саботата, еден руски воен брод беше оштетен во пристанишниот град Севастопол во напад со дрон, соопшти руското Министерство за одбрана. Исто така, ги обвини британските специјалисти дека ги обучувале украинските војници кои потоа ги извршиле нападите на Крим – јужниот полуостров на Украина, анектиран од Русија во 2014 година.

Москва не обезбеди докази за да ги поддржи своите тврдења. Украина не го коментираше ова прашање, додека Министерството за одбрана на Обединетото Кралство рече дека Русија „дава лажни тврдења во епски размери“.

 Украинските власти денеска ја обвинија Русија за нов „голем напад” врз енергетската инфраструктура на државата, откако властите најавија прекини во снабдувањето со електрична енергија и вода во главниот град.

„Руските терористи повторно извршија голем напад врз електричната инфраструктура во голем број украински региони”, изјави заменик-шефот на украинското претседателство, Кирило Тимошенко.

Неколку експлозии го потресоа Киев денеска само неколку дена откако Русија ја обвини Украина за напади со беспилотни летала врз нејзината флота на Крим во Црното Море.

Најмалку пет експлозии се регистрирани утрово во главниот град на Украина помеѓу 8:00 часот (06:00 GMT) и 8:20 часот.

Киев веќе беше погоден на 10 и 17 октомври со беспилотни летала.

По денешните експлозии, градоначалникот Виталиј Кличко во порака на Телеграм нагласи: „Една област на Киев е без струја, а одредени области без вода по руските напади”.

Нападот врз украинскиот главен град се случува откако Русија се повлече од историскиот договор со кој се дозволени витални пратки со жито преку поморскиот безбедносен коридор.